En Carnota existe un lar entrañable con historia e alma, un proxecto familiar que culminou coa recente e coidadosa rehabilitación de dúas antigas casas de pedra de principios do século XIX: O Lar do Mar. José Manuel Sieira e a súa familia teñen como principios “o turismo rural sostible e de calidade, a apreciación da natureza, e a contribución respectuosa á conservación do noso patrimonio cultural e natural, incluíndo ás comunidades locais na súa planificación, desenvolvemento e benestar”.

Este establecemento da Costa da Morte recentemente adherido a Terra Atlántica ofrece aos seus clientes 4 habitacións dobres e unha suite, nun conxunto arquitectónico catalogado como patrimonio histórico-artístico e cultural galego que integra dúas casas de pedra e un palleiro. Promovendo o entendemento medioambiental e o desenvolvemento rural, os materiais do fogar son naturais e tradicionais, mantendo a estrutura de construción de máis de 200 anos, coa súa lareira, o seu forno e a súa cociña con pía de pedra. Así mesmo, a casa rural está acreditada co máximo nivel de eficiencia enerxética “porque cremos nun consumo enerxético responsable e eficiente, nun fogar saudable que respecta a contorna”.

Pero ademais da tradición, O Lar do Mar tamén fomenta a innovación. Por ese motivo, a maiores doutros métodos habituais de pago, aceptan a moeda virtual Bitcoin. Para pagar con esta divisa non hai máis que seguir as instrucións da súa páxina web. Haberá que probar, logo!