O I Concurso de Fotografía e Vídeo ‘Que é para ti a Costa da Morte?’, primeiro organizado pola marca territorio « Costa da Morte. Terra Atlántica », resolveuse onte tras reunirse o xurado en Baio e decidir a concesión dos premios.

Ese xurado, formado por José Manuel López, Secretario do GDR Costa da Morte; Javier González, Vicepresidente do GDR Costa da Morte; Jesús Picallo, representante do Semáforo de Fisterra, empresa adherida á marca; Begoña Fernández, xerente de Stoupa, empresa adherida á marca; e Ana García, xornalista; tivo difícil a elección entre as 52 pezas participantes, divididas en dúas categorías: fotografía e vídeo. Esta decisión do xurado sumábase á do público, quen a través de votacións decidía tamén un premio en cada unha desas categorías, facendo un total de catro galardóns.

O concurso, que se desenvolveu na rede social Instragram, tiña por obxectivo poñer en valor a Costa da Morte e valoraba que se capturasen a identidade, valores emocionais ou características desta terra. As obras gañadoras son autoría de @mgrilles, @o_rincon_do_bichinho, @garciafatima23 e @lo0opezz. Os premios, consistentes en tablets e smartphones, entregaranse nunha cerimonia cuxa data se anunciará proximamente.